(روز نامہ قدس ۔آنلائن خبر رساں ادارہ ) صیہونی فورسز نے چھاپہ مار کارروائیوں کےد وران فلسطینیوں کو اغوا کیا اوراہلخانہ جن میں بزرگ والدین بھی شامل تھے ان کو تشدد کا نشانہ بنایا۔
فلسطین پر قابض غیر قانونی صیہونی ریاست اسرائیل کی نام نہاد سیکیورٹی فورسز نے گذشتہ روز مقبوضہ مغربی کنارے کے مشرقی شہر نابلس پر دھاوا بولا اور ولید الدش اور محمد الدش نامی دو فلسطینی بھائیوں کو اغوا کیا جبکہ ان کے بوڑھے والدین پر تشدد کیا جن کو بعد میں زخمی حالت میں اسپتال منتقل کر دیا گیا۔
صیہونی فورسز نے مقبوضہ بیت المقدس، الخلیل اور نابلس سمیت متعدد مقامات سے فلسطنیوں کو اغوا کیا جس کی تاحال درست تفصیلات مرتب نہیں کی جاسکی ہے تاہم ذرائع کا کہنا ہے کہ اغوا کنندگان کی تعداد 50 سے زائد ہے۔
غاصب فورسز نے کئی ایسے فلسطینیوں کے گھروں پر چھاپہ مار کارروائیاں کی جو پہلے ہی صیہونی جیلوں میں اسیری کاٹ رہے ہیں، صیہونی فورسز نے ان کے اہلخانہ سے پوچھ گچھ کی اور انہیں دھمکیاں دیں، نتیجتاً فلسطینی شہریوں اور اسرائیلی فوجیوں کے درمیان پر تشدد جھڑپیں ہوئیں جس کے جواب میں غاصب فورسز نے آنسو گیس کے گولے برسائے اور براہ راست فائرنگ کی ۔
فائرنگ اور شیلنگ سے کم سے کم 30 کے قریب فلسطینیوں کے زخمی ہونے کی اطلاع ہے جبکہ اسرائیلی فوج نے متعدد فلسطینیوں کو اغوا کر کے نامعلوم مقامات پر منتقل کردیا ہے۔
واضح رہے کہ صرف گزشتہ مئی میں، غاصب صیہونی فورسزنے مقبوضہ فلسطین کے مختلف علاقوں سے 430 فلسطینی شہریوں کو حراست میں لیا، جن میں 52 بچے اور 11 خواتین شامل تھیں۔