(روز نامہ قدس ۔آنلائن خبر رساں ادارہ ) سال 2022 فلسطینیوں کے لئے گذشتہ دس سالوں کے مقابلے میں خونریز ترین اور سنگین جرائم سمیت انسانی حقوق کی سنگین زیادتیوں کا سال تھا۔
گذشتہ روز مقبوضہ فلسطین میں انسانی حقوق کےلئے کام کرنےوالے والے اداروں ، کمیشن برائے اسیران، فلسطینی اسیران کلب، ضمیر ایسوسی ایشن، اور وادی حلوہ سینٹر القدس نے اپنی مشترکہ سالانہ رپورٹ برائے سال 2022جاری کی جس کے مطابق گذشتہ سال فلسطینیوں کے لئے اسرائیلی حکومت کےہاتھوں سنگین جرائم کا سال ثابت ہوا ۔غیر قانونی صہیونی ریاست اسرائیل کی نام نہاد سیکیورٹی فورسز نے مقبوضہ بیت المقدس اور محصور شہر غزہ سمیت فلسطین کے دیگر شہروں اور قصبوں میں چھاپہ کار کارروائیوں کے دوران 7000 سے زائد فلسطینیوں کو گرفتار کیا۔
گرفتارہونے والے فلسطینیوں میں882بچوں اور 172 خواتین شامل ہیں، اسرائیلی فوج کے کریک ڈاؤن میں سب سے زیادہ گرفتاریاں پچھلے سال اپریل میں کی گئیں جب قابض فوج کی چھاپہ مار کارروائیوں میں 1,228 فلسطینیوں کو گرفتارکیا گیا۔ مئی اور اکتوبر میں 690 گرفتاریاں ہوئیں۔