(روز نامہ قدس ۔آنلائن خبر رساں ادارہ ) رواں ماہ صہیونی فوج نے فلسطینیوں کے 100 سے زائد گھروں کو غیر قانونی قرار دیتے ہوئے مسمار کیا ہے جس کے باعث ہزاروں فلسطینی بے گھر ہوچکے ہیں۔
غیر قانونی صہیونی ریاست کی فوج نے مقبوضہ بیت المقدس کے شہر الخلیل میں فلسطینی گھروں کو غیر قانونی قرار دیتے ہوئے مسمار کردیا ہے۔
مسمار کیے گئے ایک گھر کے مالک عزام جابر نے گھر کی مسماری کے بارے میں بات کرتے ہوئے کہا ‘ اسرائیلی فوجیوں نے پیر کی صبح سویرے ان کے تین منزلہ نو تعمیر شدہ گھر پر حملہ کرکے اسے مسمار کر دیا ہے جو حال ہی میں تعمیر کیا گیا تھا اور وہ اپنے اہل خانہ کے ساتھ اس میں منتقل ہونے کی تیاری کر رہے تھے کہ اسرائیلی فوجیوں نے اسے منہدم کر دیا۔
اسرائیلی فوجیوں نے الخلیل کے علاقے یطہ میں ایک زیر تعمیر گھر کو بھی صبح سویرے مسمار کر دیا ۔ یہ گھر مسمار کرتے ہوئے فوجیوں کا کہنا کہ اس کی تعمیر غیر قانونی ہے اور لائسنس کے بغیر کی جارہی ہے۔یہودیوں کے فلسطینیوں پر مظالم کے حوالے سے ایک اور واقعے میں یہودی آباد کاروں نے ترقومیا ٹاون کے مشرق میں زیتون کے سو پھلدار پودوں کو نقصان پہنچایا ۔ زیتون کے یہ پھلدار پودے الزبینہ خاندان کے باغ کی صورت لگے ہوئے تھے۔