(روز نامہ قدس ۔آنلائن خبر رساں ادارہ ) سوشل میڈیا پر آنسو گیس کی شیلنگ سے اسکول میں موجود طالبات کے دم گھٹنے کی تصاویر اور ویڈیوز نے اسرائیلی درندگی کو ایک بارپھر دنیا کے سامنے عیاں کردیا ہے۔
فلسطینی ذرائع کے مطابق غاصب صہیونی فوج نےگذ شتہ روز مقبوضہ بیت المقدس کے شمال مشرق میں واقع قصبہ عناتا میں قائم ایک فلسطینی گرلز اسکول پر اچانک بلاجواز حملہ کردیا اور بھاری مقدار میں آنسو گیس کی شیلنگ کی۔ شیلنگ کے باعث درجنوں فلسطینی طالبات دم گھٹنے کے باعث بے ہوش ہوئیں۔
سماجی رابطوں کی مختلف ویب سائٹ پر شیئر کی گئیں واقع کی تصاویر اور ویڈیو ز میں دیکھا جاسکتا ہے کہ صہیونی فورسز نے اسکول پر اچانک اور بلا جواز حملہ کیا اور بھاری مقدار میں آنسو گیس کی شیلنگ شروع کی ۔
خیال رہے مشرقی القدس اور مغربی کنارے کے مختلف شہروں میں اسرائیلی فوج اور یہودی آباد کاروں کی جانب سے تقریبا روزانہ در اندازی کی جاتی ہے۔ فلسطینی آئے روز صہیونی اشتعال انگیزی اور حملوں کا سامنا کرتے ہیں۔ کئی مرتبہ جھڑپیں شروع ہو جاتی ہیں اور فلسطینیوں کو بھاری جانی نقصان بھی اٹھانا پڑتا ہے۔