(روز نامہ قدس ۔آنلائن خبر رساں ادارہ ) رات گئے صہیونی فورسز نے فلسطینی آبادی پر دھاوا بولا اور فائرنگ اور آنسو گیس کی شلینگ کی جس کے نتیجے میں فلسطینی فٹبالر شہید ہوگیا جبکہ دیگر پانچ فلسطینی زخمی ہوگئے۔
فلسطینی ذرائع کے مطابق رات گئے غیر قانونی صہیونی ریاست اسرائیل کی نام نہاد سیکیورٹی فورسز نے درجنوں غیر قانونی آباد کاروں کو حضرت یوسف علیہ سلام کے مزار کی زیارت کروانے کے لیے فوجی بلڈوزر کے ساتھ فلسطینیوں کی آبادی پر دھاوا بولا۔ اس کے نتیجے میں پرتشدد جھڑپیں شروع ہوئیں ،صہیونی فورسز نے مزاحمت کرنے والے فلسطینیوں کو منتشر کرنے کےلئے طاقت کا بھرپور استعمال کرتے ہوئے فائرنگ کی جسکی زد میں آکر 23 سالہ فلسطینی فٹبالر احمد عاطف دارغمہ سر پر گولی لگنے سے شدید زخمی ہوا جس کو اسپتال منتقل کردیا گیا تاہم وہ زخموں کی تاب نا لاتے ہوئے شہید ہوگیا ، غاصب فوجیوں کی فائرنگ سے دیگر پانچ فلسطینی بھی زخمی ہوئے۔
مقامی اور میڈیا ذرائع کے مطابق چار نوجوان گولیاں لگنے سے زخمی ہوئے، جن میں سے ایک بعد میں زخموں کی تاب نہ لاتے ہوئے چل بسا جس کے باعث 24 گھنٹوں کے دوران صہیونی فوج کے ہاتھوں شہید ہونے والوں کی تعداد 2 ہوگئی۔ جھڑپوں کے دوران آنسو گیس کے استعمال سے 19 شہری متاثر ہوئے۔