(روز نامہ قدس ۔آنلائن خبر رساں ادارہ ) اسپتال ذرائع کا کہنا ہے کہ چاقو کا حملہ گہرا تھا جس نے اندرونی اعضاء کو متاثر کیا ہے آبادکار کی حالت تشویشناک ہے۔
ناجائز صہیونی ریاست اسرائیل کے ایک عبرانی ٹی وی چینل کی رپورٹ کے مطابق منگل کی شب مقبوضہ بیت المقدس کے شہر نابلس کے ایک قصبے الفندق کے قریب 55 سالہ ایک صہیونی آبادکارپر چاقوں سے حملہ کیا گیا جس کے نتیجے میں وہ شدید زخمی ہوگیا ہے ۔
رپورٹ میں حملے کا الزام فلسطینی شہری پر لگایا گیا ہے جس کی تلاش کے لئے اسرائیلی فوج اور خفیہ ایجنسی چھاپہ مار کارروائیاں کرر ہی ہیں تاہم ابھی تک حملہ آور کے حوالے سے کوئی اطلاعات فراہم نہیں کی گئیں ، رپورٹ میں اس بات پر بھی حیرانی ظاہر کی گئی ہے کہ جہاں صہیونی آبادکارپر حملہ کیا گیا وہاں اسرائیلی فوجی چوکی تھی جہاں فوجی اہلکار موجود تھے اس کے باوجود حملہ آور کو شناخت کرنا تو دور کسی نے اس کو دیکھا بھی نہیں۔
اسرائیلی فوج کی جانب سے جاری ہونے والے بیان میں کہا گیا ہے کہ علاقے کی مکمل ناکہ بندی جاری ہے اور جلد حملہ آور کو گرفتار کرلیا جائے گا۔