اسرائیل صورتحال کو مزید کشیدہ بنانے کے اقدامات سے گریز کرے، متحدہ عرب امارات

(روز نامہ قدس ۔آنلائن خبر رساں ادارہ ) متحدہ عرب امارات نے صیہونی ریاست کی جانب سے مسجد اقصیٰ پر آبادکاروں کے  منظم  دھا ؤوں  کی مذمت کرتے ہوئے کہا ہے کہ  اسرائیلی اقدامات دو ریاستی حل تک پہنچنے میں بڑی رکاوٹ ہیں۔

متحدہ عرب امارات  کی وزارت خارجہ کی جانب سے  گذشتہ روز صیہونی ریاستی سرپرستی میں غیر قانونی صیہونی آبادکاروں اور حکومتی اعلیٰ عہدیداروں کی جانب سے مسجد اقصیٰ پر اشتعال انگیز دھاوے کی مذمت میں جاری بیان میں متحدہ عرب امارات کی وزارت خارجہ نے مسجد اقصیٰ کو مکمل تحفظ فراہم کرنے اور اس میں خطرناک اور اشتعال انگیز خلاف ورزیوں کو روکنے کی ضرورت کے حوالے سے امارات کے مضبوط موقف کا اعادہ کیا۔

وزارت خارجہ نے بین الاقوامی قانون اور موجودہ تاریخی صورتحال کے مطابق مقدس مقامات اور اوقاف کی دیکھ بھال میں اردن کے کردار کے احترام کی اہمیت پر زور دیتے ہوئے صیہونی  حکام سے مطالبہ کیا کہ وہ کشیدگی کو روکیں اور خطے میں کشیدگی اور عدم استحکام کو بڑھانے کے لیے اقدامات سے گریز کریں۔

متحدہ عرب امارات کی جانب سے ان تمام اقدامات کو مسترد کرنے پر زور دیا جو بین الاقوامی قراردادوں کی خلاف ورزی کا باعث بنتے ہیں اور خطرات میں اضافہ کرتے ہیں۔

وزارت خارجہ نے مشرق وسطیٰ میں امن کے عمل کو آگے بڑھانے کے لیے تمام علاقائی اور بین الاقوامی کوششوں کی حمایت کرنے کے ساتھ ساتھ ان غیر قانونی طریقوں کو ختم کرنے کی اہمیت پر زور دیا جو دو ریاستی حل تک پہنچنے اورمشرقی یروشلم کے دارالحکومت پرمشتمل 1967 کی سرحدوں پر ایک آزاد فلسطینی ریاست کے قیام کے لیے خطرہ ہیں۔