(روز نامہ قدس ۔آنلائن خبر رساں ادارہ ) فلسطینی رہنماء نے کہا کہ صہیونی حکومت کے ساتھ تعلقات کی بحالی کا مقابلہ کرنے کیلیےبڑے پیمانے پر تحریک چلائے جانے کی ہنگامی میٹنگ منعقد کئے جانے کی بہت ضرورت ہے۔
تفصیلات کے مطابق مقبوضہ فلسطین میں عوامی محاذ برائے آزادی فلسطین کی مرکزی کمیٹی کے رکن ماہر مزہرکی جانب سےجاری بیان میں یہ واضح کیا گیا ہے کہ قابض صہیونی ریاست اسرائیل کے ساتھ بعض ملکوں نے تعلقات معمول پر لانے کی کوشش جاری رکھی ہوئی ہے جو تمام عرب ملکوں اور فلسطینیوں کی امنگوں کی راہ میں خطرناک ترین مسئلہ ہے۔
فلسطینی رہنماء ماہر مزہر نے کہا کہ غاصب صیہونی حکومت کے ساتھ تعلقات معمول پر لانے والے ممالک فلسطینیوں کے خلاف وحشیانہ جرائم کا سلسلہ تیز ہونے کا باعث بنیں گے تاہم اسرائیل زوال کا شکار ہے، دوستی کا ہاتھ بڑھانے والے ممالک خود گمنام ہو جائیں گے۔
انہوں نےمزیدکہا کہ غاصب صیہونی حکومت کے ساتھ تعلقات کی بحالی کا مقابلہ کرنے کے لئے بڑے پیمانے پر تحریک چلائے جانے اورعوامی محاذ برائے آزادی فلسطین کی ہنگامی میٹنگ منعقد کئے جانے کی بہت ضرورت ہےاور یہ سچائی دنیا کے سامنے آنے والی ہے جب غاصب صیہونی حکومت زوال پزیر ہوگی اور فلسطینیوں کو کامیابی نصیب ہو گی۔