(روز نامہ قدس ۔آنلائن خبر رساں ادارہ ) آسٹریلیا نے غیر قانونی صیہونی ریاست اسرائیل کے فلسطین پر غاصبانہ قبضے کو سرکاری سطح پر غیر قانونی تسلیم کرتے ہوئے فلسطین کو مقبوضہ ملک قرار دے دیا۔
غیر ملکی میڈیا کے مطابق امریکا کی جانب سے متعدد بار غیر قانونی صیہونی ریاست اسرائیل کی ظالمانہ پالیسیوں اور نہتے فلسطینیوں کے قتل عام پر خاموشی اور کئی مواقعوں پر کھل کر حمایت کے بعد صیہونی ریاست اسرائیل کی دھونس دھمکیوں اور ظلم کی پالیسیوں کے خلاف اب دنیا بھر میں مضبوط اور مستحکم آوازیں بلند ہورہی ہیں جس کے بعد مسئلۂ فلسطین کو عالمی سطح پر پس پشت ڈالنے کی صیہونی سازش اب زیادہ دیر تک کےلئے کار آمد نہیں رہ سکے گی۔
آسٹریلیا کی وزیر خارجہ پینی وونگ نے پارلیمنٹ کے باہر قانون سازی پر گفتگو کرتے ہوئے بتایا کہ آج سے ملک کی تمام سرکاری دستاویز اور بیانات میں فلسطین کو مقبوضہ اور غیر قانونی صیہونی ریاست اسرائیل کو قابض لکھا اور پڑھا جائے گا اور بیت المقدس کو بھی مقبوضہ علاقہ تصور کیا جائے گا۔