ہم اپنے شہداء کے خون کو نہیں بھولتے، انتقام ضرور لیتے ہیں، حماس

(روز نامہ قدس ۔آنلائن خبر رساں ادارہ ) ’حماس‘ نے غاصب صہیونیوں کے خلاف کیے گئے فدائی حملے پر قوم کو مبارک باد پیش کی ہے اور اسے فلسطینیوں کے خلاف اسرائیل کی منظم ریاستی دہشت گردی کا فطری رد عمل قرار دیا ہے۔

مقبوضہ فلسطین میں غیر قانونی صیہونی ریاست اور اس کی نام نہاد سیکیورٹی فوسز کے مظالم کے خلاف برسرپیکار اسلامی مزاحمتی تحریک حماس  کی جانب سے جاری کردہ بیان میں مقبوضہ بیت المقدس کے ( Neve Yaacov ) ’’نبی یعقوب‘‘ کے قریب الرام قصبے میں فدائی حملے میں غیر قانونی صیہونی آبادکاروں کو جہنم واصل کرنے پر قوم کو مبارکباد دیتے ہوئے کہا ہے کہ یہ بہادرانہ آپریشن جنین کے شہیدوں کے بدلے میں کیا گیا ہے، یہ مسجد اقصیٰ کی بے حرمتی اور جنین میں غاصبانہ قتل عام کا فطری  ردعمل تھا۔

بیان میں کہا گیا کہ ہمارے لوگ اپنے شہداء کے خون کو نہیں بھولتے مناسب وقت اور جگہ پر ان کا بدلہ لیتے ہیں۔

واضح رہے کہ جمعرات کی صبح صیہونی فوج نے نے غرب اردن کے شمالی شہر جنین کے شفاعت پناہ گزین کیمپ پر دھاوا بول دیا تھا جس میں ساٹھ سالہ خاتون سمیت کم سے کم دس فلسطینی شہید اور 20 سےزاید زخمی ہوگئے تھے۔ اس واقعے کے بعد فلسطین میں حالات سخت کشیدہ تھے اور فلسطینیوں میں شدید غم وغصے کی فضا پائی جا رہی ہے۔