(روز نامہ قدس ۔آنلائن خبر رساں ادارہ ) صیہونی فوج نےحملے کا انکار کرتے ہوئے کہا ہے کہ فوجی ڈرون معمول کی پرواز کے دوران لبنان کے علاقے میں گر ا ہے ، طیارے کو نشانہ نہیں بنایا گیا۔
غیرملکی خبر رساں ادارے کی رپورٹ کے مطابق لبنان کی مزاحمتی تحریک حزب اللہ نے گذشتہ روز غیر قانونی صیہونی ریاست اسرائیل کا ایک فوجی ڈرون جو لبنان کی سرحد میں داخل ہورہا تھا کو تباہ کردیا ہے۔
صیہونی ریاست کی غیر قانونی غاصب فورس کے ترجمان نے حزب اللہ کی جانب سے کئے گئے دعوے کو مسترد کرتے ہوئے کہا ہے کہ ہمارا فوجی ڈرون معمول کی پرواز کے دوران لبنان کے علاقے میں گر ا ہے، طیارے کو کسی کی جانب سے نشانہ نہیں بنایا گیا۔
واضح رہے کہ یہ واقعہ ایسے وقت میں ہوا ہے کہ جب لبنان اور اسرائیل کی سرحد پر پچھلے کئی ہفتوں سے صورتحال کشیدہ ہے، حالیہ تنازع کا مرکزی علاقہ شیبا فارمز ہیں۔ رواں ماہ کے آغاز میں اسرائیلی فوجیوں نے سرحدی علاقے میں لبنان کےاحتجاجی مظاہرین کو منتشر کرنے کیلئے آنسو گیس کا استعمال کیا تھا۔