(روز نامہ قدس ۔آنلائن خبر رساں ادارہ )فلسطین کی اسلامی مزاحمتی تحریک حماس نے 14 اپریل 2023 بروز جمعہ یوم قدس کی یاد میں ریلیوں میں بڑے پیمانے پر شرکت کرنے والے عرب اور اسلامی عوام کو سراہا ہے۔
یوم قدس کی مناسبت سے نکالی گئی ریلی کے دوران غزہ میں تحریک حماس کے رہنما یحییٰ السنوار نے کہا کہ مزاحمت ہمیشہ بیت المقدس کے عوام کی ثابت قدمی کی حمایت اور حفاظت کرے گی۔
السنوار نے مقبوضہ بیت المقدس ، مقبوضہ مغربی کنارے اور 1948 کی مقبوضہ سرزمین کے فلسطینی عوام سے بھی مطالبہ کیا کہ وہ یروشلم کے اسلامی اور عیسائی مقدسات کے خلاف صہیونی دشمن کے قبضے کے ذریعے چھیڑی جانے والی ’مذہبی جنگ‘ کا مقابلہ کرنے کے لیے الاقصیٰ میں متحرک ہوں۔
السنوار نے اپنی تقریر میں عرب اور اسلامی ممالک کے اتحاد اور ان کے درمیان تنازعات کو ختم کرنے کی ضرورت پر زور دیا تاکہ مسلمانوں کے پہلے مسئلے کے گرد اکٹھے ہو سکیں۔
حماس کے سینئر عہدیدار نے تصدیق کی کہ فلسطینی عوام مسجد اقصیٰ اور دیگر مقدس مقامات اور مقدسات کو صہیونی جارحیت سے بچانے کے لیے تیار ہیں۔
اس سے قبل جمعے کو حماس تحریک کے ایک بیان میں عرب اور مسلم ممالک سے مطالبہ کیا گیا تھا کہ وہ ہمارے فلسطینی عوام کے لیے مزید حمایت حاصل کرنے کے لیے تمام کوششوں کو متحرک کریں۔
بیان میں اندرون ملک اور بیرون ملک پناہ گزین کیمپوں میں مقیم فلسطینیوں کو بھی سراہا گیا جنہوں نے اپنے وطن کے دفاع کے لیے جامع مزاحمت کا آپشن قبول کیا ہے۔
یوم قدس کی مناسبت سے اور فلسطینی عوام اور مزاحمت کی تجدید کے لیے مختلف عرب اور اسلامی ممالک میں جمعہ کے روز کئی ریلیاں نکالی گئیں۔