(روز نامہ قدس ۔آنلائن خبر رساں ادارہ ) حماس کے ساتھ جنگ کے آغاز سے اب تک صیہونی فوج میں 1,210 نئے زخمیوں کی تصدیق کی گئی ہے جن کو صیہونی فوج نے معذور قرار دیتے ہوئے فوج سے رخصت دے دی ہے۔
غیر قانونی صیہونی ریاست اسرائیل کے معروف نیوز چینل 12 نے ذرائع سے جاری اپنی رپورٹ میں انکشاف کیا ہے کہ 7 اکتوبر سےجاری جنگ کے دوران حماس کے جانبازوں نے صیہونی فوج کو سوچ سے زیادہ نقصان پہنچایا ہے اس دوران اسرائیل کے ڈیڑھ ہزار سے زائد شہری جن میں 307 فوجی افسران اور سپاہی شامل ہیں مارے جاچکے ہیں جبکہ تین ہزار سے زائد زخمی ہیں۔
گذشتہ روز اسرائیلی چینل 12 نے اپنی رپورٹ میں انکشاف کیا ہے کہ صہیونی فوج نے "طوفان الاقصیٰ” جنگ کے آغاز سے اب تک اسرائیلی فوج کی صفوں میں 1,210 نئے زخمیوں کا اندراج کیا گیا ہے جبکہ فوج نے انہیں معذور قرار دیتے ہوئے فوجی خدمات سے رخصت دے دی ہے۔
صیہونی فوج نے اس سے قبل اعلان کیا تھا کہ 7 اکتوبر کو آپریشن طوفان الاقصیٰ کے بعد سے اس کے 307 فوجی ہلاک اور 200 سے زائد کو گرفتار کر لیا گیا ہے، جس میں زمینی، سمندری اور فضائی حملے اور غزہ کے اطراف میں متعدد بستیوں میں مزاحمتی جنگجوؤں کی دراندازی شامل ہے۔
اسرائیلی قابض فوج کی جانب سے مسلسل 17ویں روز بھی غزہ کی پٹی کو شدید فضائی حملوں کا نشانہ بنانے کا سلسلہ جاری ہے، جس کے نتیجے میں پورے محلے تباہ، 4700 سے زائد افراد شہید ہوچکے ہیں۔ شہداء میں زیادہ تر بچے اور خواتین ہیں، جبکہ 13500 سے زائد زخمی ہوئے۔