(روز نامہ قدس ۔آنلائن خبر رساں ادارہ ) صیہونی ریاست کی جانب سے فوجی نقصانات کے حوالے سے سخت سنسر شپ نافذ کی گئی ہے ، اسرائیلی فوج حقیقی نقصان کی تفصیلات فراہم نہیں کرتی ہے۔
غیر قانونی صیہونی ریاست کی نام نہاد فوج نے گذشتہ روز فلسطینی مزاحمت کاروں کے ساتھ سات اکتوبر سے جاری جنگ میں فوجیوں کی ہلاکت کی تفصیلات جاری کی ہیں جس کے مطابق اب تک مجاہدین کے ہاتھوں چھ ماہ کے دوران مارے جانے والے صیہونی فوجیوں کی تعداد 600 ہوگئی ہے جبکہ غزہ میں جنگ ابھی جاری ہے۔
واضح رہے کہ اسرائیلی حکومت کی جانب سے مجاہدین کے ہاتھوں اسرائیلی فوج کو ہونے والے نقصان کی تفصیلات منظر عام پر لانے پر سخت پابندی ہے ، اسرائیلی فوج کا کہنا ہے کہ چھ ماہ سے جاری اس جنگ میں اس کے 600 فوجی ہلاک ہوئے ہیں جبکہ اسرائیلی آزاد ذرائع اور اسپتالوں سے آنے والی خبروں کے مطابق اس جنگ میں اب تک 2500 سے زائد اسرائیلی فوجی ہلاک اور 20 ہزار سے زائد زخمی ہیں جس میں سے 8 ہزار وہ ہیں جو مکمل طورپر جسمانی معذوری کا شکار ہوچکے ہیں ۔
یہ ہلاکتیں غزہ میں مزاحمت کاروں کے ہاتھوں ہلاک ہونے والے اسرائیلی فوجیوں کی ہلاکتوں کی سب سے بڑی تعداد ہے جو اسرائیل کو غزہ میں برداشت کرنا پڑی ہے اور جنگ ابھی جاری ہے۔