(روز نامہ قدس ۔آنلائن خبر رساں ادارہ ) اسرائیل کی جانب سے 80 نامعلوم فلسطینیوں کی لاشوں کو رفح بارڈر کے قریب اجتماعی طور پر دفن کر دیا گیا ۔
غیر قانونی صیہونی ریاست اسرائیل کی جانب سے مقبوضہ فلسطین کے محصور شہر غزہ پر جاری وحشیانہ بمباری 83 ویں روز بھی جاری ہے اس دوران اسرائیلی جارحیت میں شہید ہونے والے 80 فلسطینیوں کے جسد خاکی جن کو اسرائیلی فوج اپنے فوجیوں اور یرغمالیوں کی شناخت کےلئے اپنے ہمراہ لے گئی تھی کو گذشتہ روز کریم ابو سالم گزر گاہ کے ذریعے غزہ میں ریڈ کراس کے حوالے کیا گیا جہاں ان لاشوں کو پٹی کے شمالی حصے سے اکٹھا کیا گیا اور جنوب میں رفح کے ایک قبرستان میں ایک طویل خندق میں دفن کیا گیا۔
اسرائیل کی جانب سے فلسطینیوں کے قتل عام کے باعث یہ چوتھا موقع ہے جب فلسطینیوں کی اجتماعی تدفین کی جارہی ہے اس سے قبل اسرائیلی فوج نے الشفا اسپتال پر حملہ کیا اور درجنوں فلسطینیوں کو شہید کیا اس دوران اسرائیلی فوج نے کسی کو بھی اسپتال سے باہر جانے کی اجازت نہیں دی تھی اور جو کوئی اسپتال سے باہر جانے کی کوشش کرتا اس کو قتل کردیا جاتا جس کے بعد شہید فلسطینیوں کی اجتماعی تدفین اسپتال کے احاطےمیں ہی کی گئی تھی۔