(روز نامہ قدس ۔آنلائن خبر رساں ادارہ ) صیہونی فورسز نے امدادی سامان کی ترسیل کا کام کرنے والے فلسطینی پولیس اہلکاروں کو دانستہ نشانہ بنایا جس کے نتیجےمیں چھ اہلکار شہید اور متعدد دیگر زخمی ہوئے۔
فلسطینی ذرائع کےمطابق غیر قانونی صیہونی ریاست اسرائیل کی فوج نے گذشتہ روز جارحیت کا شکار محصور فلسطینی شہر غزہ کے جنوبی سرحدی رفح کے علاقے خربہ العدس میں امداد فراہم کرنے کے لیے فلسطینی پولیس کی گاڑی پر بمباری کی جس کے نتیجے میں جہاد لافی یوسف الاخرس، عبدالرحمٰن حسنی العطار، عبدالعزیز اسامہ اللھوانی، انور فتحی ابو عرب، یاسر شحادہ ابو زہری اور محمد ریاض الشاعر شہید ہوگئے جبکہ دیگر کئی زخمی ہوئے ۔
اسرائیلی قابض فوج جان بوجھ کر شہریوں کو اس وقت نشانہ بناتی ہے جب وہ غزہ کی پٹی میں امدادی ٹرکوں کے انتظار میں موجود ہوتے ہیں، جس کی وجہ سے گزشتہ دنوں اور ہفتوں کے دوران درجنوں افراد ہلاک اور زخمی ہوئے۔
اسرائیلی قابض فوج نے امریکی اور یورپی حمایت سے مسلسل 123ویں روز بھی غزہ کی پٹی کے خلاف اپنی جارحیت جاری رکھی ہے، جب کہ اس کے طیاروں نے ہسپتالوں، عمارتوں، ٹاورز اور فلسطینی شہریوں کے گھروں پر بمباری کرکے انہیں سروں کے اوپر تباہ کردیا۔ جس کے نتیجے میں مزید درجنوں فلسطینی شہید اور زخمی ہوئے ہیں۔