(روز نامہ قدس ۔آنلائن خبر رساں ادارہ ) فلسطینی عوام کا تحریک حماس پر بھرپور اعتماد کااظہار ، حماس کا کہنا ہے کہ جماعت کی اصل طاقت فلسطینی عوام ہی ہیں، ‘ ہم اپنی زمین کے ایک ایک انچ کے دفاع اور اس کی آزادی کے لیے اپنا جائز حق مزاحمت استعمال کرتے رہیں گے، اس مقصد کے لیے تمام ذرائع بروئے کار لاتے رہیں گے۔’
گذشتہ روز فلسطینی مزحمتی تحریک حماس نے اپنا 35 واں یوم تاسیس اس عزم کے اعادے کے ساتھ منایا کہ فلسطینی عوام اور حماس مزاحمت کو سرزمین فلسطین کی آزادی کی منزل پانے اور قابضین کو اپنی زمین سے واپس دھکیلنے تک جاری رکھے گی۔
حماس نے کہا ہے ‘ ہمارا فلسطین سمندر سے دریا تک پھیلا ہوا ہے، یہ فلسطینی لوگوں کی سرزمین ہے۔ مسلح مزاحمت فلسطینیوں کی ایک ‘سٹریٹجک آپشن’ ہے ، یہ آپشن قبضہ روکنے اور قبضہ ختم کرنے دونوں حوالوں سے اہم ہے، اسے جاری رکھیں گے۔ ‘
یوم تاسیس کے جلسے اور جلوسوں میں فلسطینیوں کی بڑی تعداد نے شرکت کی جو مزاحمتی تحریک حماس پر فلسطینیوں کے اعتماد کا اظہار ہے، حماس کا کہنا ہے کہ جماعت کی اصل طاقت فلسطینی عوام ہی ہیں۔مقبوضہ بیت المقدس کے رہائشی فلسطینی عوام کی طرف سے مسجد اقصیٰ کے دفاع اور بے حرمتی سے تحفظ کے لیے کی جانے والی سعی اور قربانیاں قابل تحسین ہیں۔’
حماس نے جیلوں میں اسرائیلی مظالم کو جرات و بہادری کے ساتھ برداشت کرتے ہوئے سیسہ پلائی دیوار بن کر کھڑے رہنے والے فلسطینی قیدیوں کو سلام پیش کیا اور کہا ‘فلسطینی قیدیوں کی استقامت فلسطینیوں کا فخر ہے۔’