(روز نامہ قدس ۔آنلائن خبر رساں ادارہ ) شام نے عالمی برادری سے مطالبہ کیا ہے کہ وہ صہیونی حملوں کو رکوانے اور تل ابیب کو بین الاقوامی قوانین کا پابند بنانے کے لیے سنجیدہ اقدام اٹھائیں۔
ذرائع سے موصولہ اطلاعات کے مطابق گذشتہ روزرات گئے صہیونی ریاست اسرائیل کے جنگی طیاروں نے ایک بار پھر شام کے علاقے دیر الزور میں شامی فوج کے ٹھکانوں کو نشانہ بناتے ہوئے فضائی حملہ کیا جس میں 2شامی فوجیوں کے زخمی ہونے کی اطلاع ہے۔
ذرائع نے بتایا کہ صہیونی جنگی طیاروں نے شام کے شہر ی علاقے کے اردگرد مسلح افواج کے ٹھکانوں پرمیزائل داغے جس کے نتیجے میں املاک کو بھی بھاری نقصان پہنچا اوردھماکوں کی گونج سے شہری آبادی میں خوف و ہراس پھیل گیا۔
شامی حکام کی جانب سے شہری آبادی کی حدود کی خلاف ورزی کرتے ہوئے صہیونی فوج کی ان جارحانہ کارروائیوں کی مذمت کی گئی ہے اور عالمی برادری سے مطالبہ کیا ہے کہ وہ صہیونی حملوں کو رکوانے اور تل ابیب کو بین الاقوامی قوانین کا پابند بنانے کے لیے سنجیدہ اقدام اٹھائیں۔
واضح رہے کہ اسرائیل شام پر صہیونی فوج کے ان دہشت گردانہ حملوں کو باقاعدہ طور پرتسلیم نہ کرتے ہوئے حملوں کی ذمہ داری قبول نہیں کرتا اوررات کے اندھیرے میں خفیہ کارروائی کرتے ہوئے شام میں ایران، لبنانی حزب اللہ اوردیگر گروپوں کے ٹھکانوں پر حملے کرتا رہتا ہے۔