آئرلینڈ کی اسرائیل کے خلاف مقدمے میں شمولیت کا اعلان

(روز نامہ قدس ۔آنلائن خبر رساں ادارہ)  آئرلینڈ کے وزیر خارجہ مائیکل مارٹن نے اعلان کیا ہے کہ ان کی حکومت نسل کشی کنونشن کے تحت جنوبی افریقہ کی جانب سے اسرائیل کے خلاف بین الاقوامی عدالت انصاف میں دائر مقدمے میں شامل ہوگی۔

یہ درخواست رواں ماہ دسمبر کے اختتام پر دی ہیگ میں پیش کی جائے گی۔ مارٹن نے اسرائیلی کارروائیوں کو فلسطینی عوام کے خلاف اجتماعی سزا قرار دیتے ہوئے کہا کہ ان حملوں کے نتیجے میں ہزاروں افراد شہید اور لاکھوں بے گھر ہوئے ہیں۔

مارٹن نے واضح کیا کہ آئرلینڈ اس مقدمے میں نسل کشی کنونشن کی تشریح کو وسعت دینے کے لیے قانونی دلائل فراہم کرے گا تاکہ شہریوں کا تحفظ یقینی بنایا جا سکے۔ جنوبی افریقہ نے یہ مقدمہ دسمبر 2023 میں اقوام متحدہ کے کنونشن کی خلاف ورزی اور غزہ میں فلسطینیوں کے خلاف نسل کشی کے الزامات کی بنیاد پر دائر کیا تھا۔