(روز نامہ قدس ۔آن لائن خبر رساں ادارہ) مسجد اقصی کے امام شیخ اکرمہ صابری نے کہا ہے کہ امریکی سرپرستی میں صدی کی ڈیل کے نام پر فلسطینیوں کے حقوق پر ڈاکہ مارنے جیسی گھناونی سازش مکمل طورپر ناکام ہوگئی ہے۔
نماز جمعہ کی خطبے میں انہوں نے بیان دیتے ہوئے امریکہ اور اسرائیل کو خبردار کیا کہ صدی کی ڈیل جیسے معاملات بات چیت کے تمام دروازے بند کردیں گے۔انہوں نے ڈیل آف سینچری منصوبے کو امریکہ اور صیہونیت کا مشترکہ منصوبہ قرار دیا،جس کا واحد مقصد فلسطینوں کو فلسطین کے بجائے دیگر عرب ممالک میں بسانا اور انکی سرزمین پر قابض صیہونی ریاست کےتسلط کو مضبوط کرنا ہے۔جو کہ کسی بھی صورت برداشت نہیں کیا جائے گا۔
انہوں نے امریکی منصوبہ سازوں پر تنقید کرتے ہوئے کہا کہ وہ اردن کی ویلی کو مکمل طور پر اسرائیل کے قبضہ میں رکھنا چاہتے ہیں،تا کہ فلسطینی سرحدوں کو مزید محدود کیا جائے اورابو دیس کو فلسطین کا دارلحکومت بنایا جائے۔
انہوں نے سوال کیا کہ کیا اس قسم کی متنازعہ ڈیل فلسطین کے مسائل کبھی حل کرسکتی ہے؟یہ سازش فلسطینی عوام کے خلاف کی گئی سازشوں میں سب سے بڑی سازش ہے۔اور اس کو قبول کرنے کے بعد فلسطینی عوام بلکل تہی دست رہ جائیں گے۔