(روز نامہ قدس ۔آنلائن خبر رساں ادارہ )7 اکتوبر سے جاری اسرائیلی دہشتگردی میں اب تک خواتین اور بچوں سمیت 40،534 فلسطینی شہید اور 93،778 زخمی ہوچکے ہیں۔
غیر قانونی صیہونی ریاست اسرائیل کی نام نہاد فوج نے امریکی اور مغربی ممالک کی فوجی مدد سے غزہ میں نہتے فلسطینیوں کی نسلی کشی کی بھیانک مہم جاری رکھی ہوئی ہے۔ آج غزہ پر صیہونی دہشتگردی اور فلسطینیوں کی نسل کشی کو 328 دن مکمل ہوگئے ہیں۔
قابض فوج نے آج غزہ میں جنگی طیاروں اور توپ خانے سے مزید وحشیانہ حملے جاری رکھے ، گذشتہ 24 گھنٹوں کے د وران صیہونی حملوں میں خواتین اور بچوں سمیت 51 فلسطینی شہید اور 131 زخمی ہوئے ہیں۔
غاصب طیاروں اور توپ خانوں نے آج ہفتے کے روز غزہ کی پٹی کے مختلف علاقوں میں بمباری کی جس میں گھروں، بے گھر افراد کی پناہ گاہوں اور سڑکوں پر موجود شہریوں کو نشانہ بنایا، جس میں درجنوں شہری شہید اور زخمی ہوئے۔قابض اسرائیلی فوج کے طیاروں کی آج صبح سویرے غزہ شہر کے مغرب میں ایک گھر پر بمباری کے نتیجے میں ایک بچی سمیت آٹھ افراد شہید اور چار زخمی ہو گئے اور بمباری سے گھر میں آگ لگ گئی۔
طبی سروسز نے کہا کہ ہمارا عملہ الامل ہوٹل کے قریب ایک مکان کو نشانہ بنانے سے دو شہید اور چار زخمیوں کو نکالنے میں کامیاب ہو گیا اور عملہ ابھی بھی جائے وقوعہ پر موجود ہے اور سول ڈیفنس گھر میں لگنے والی آگ پر قابو پانے کی کوشش کر رہا ہے۔
جمعرات کو فجر کے وقت ایمبولینس اور سول ڈیفنس کے عملے نے قابض فورسز کی جانب سے نصیرات میں ایک مکان کو نشانہ بنانے کے نتیجے میں دو لڑکیوں کوزخمی حالت میں مکان سے نکالا جب کہ دیر البلح میں ایک گھر پر قابض فوج کی بمباری کے بعد ایک خاتون شہید ہوگئے۔قابض طیاروں نے وسطی غزہ کی پٹی میں نصیرات کیمپ کے مغرب میں الصوارحہ کے علاقے میں ایک مکان پر بمباری کی۔