فلسطین کے مقبوضہ مغربی کنارے کے مختلف شہروں میں منگل کے روز اسرائیلی فوجیوں نے مختلف شہروں میں گھر گھر تلاشی کی کارروائیوں میں کم سے کم 21 فلسطینی شہریوں کو حراست میں لے لیا ہے۔
مقامی فلسطینی ذرائع اور سیکیورٹی حکام نے کے مطابق صہیونی فوجیوں نے نابلس شہر میں تلاشی کی کارروائیوں کے دوران تین سابق اسیران سمیت چھ فلسطینیوں کر حراست میں لیا۔ گھر گھر تلاشی کے دوران الخلیل شہر سے ایک بچے سمیت 9 افراد کو گرفتار کیا گیا ہے جب کہ شمالی رام اللہ سے پانچ افراد کو گرفتار کرکے نامعلوم مقام پر منتقل کردیا گیا۔ رام اللہ سے گرفتارکیے گئے شہریوں کا تعلق سفلیت شہر سے بتایا جاتا ہے تاہم ان کی شناخت نہیں کی جاسکی ہے۔مقامی ذرائع کے مطابق نابلس میں تلاشی کے دوران سابق اسیران عبدالحکیم القدح، رامی ناصر اور تیمور الخراز کو حراست میں لیا گیا۔ شمالی نابلس میں الجبل الشمالی کالونی میں اسرائیلی فوجی امجد علیوی نامی ایک اسیر کے گھر میں زبردستی گھس گئے اور گھر میں توڑپھوڑ کی۔
ادھر مشرقی نابلس میں اسرائیلی فوجیوں نے تلاشی کے دوران دو افراد کو حراست میں لینے کے بعد نامعلوم مقام پر منتقل کردیا۔
الخلیل شہر میں اسرائیلی فوجیوں نے 14 سالہ سیف سلیم رشدی کو العروب پناہ گزین کیمپ سے حراست میں لیا۔ اس کے علاوہ اس شہر سے کل نو شہری گرفتار کیے گئے۔ ان میں 21 سالہ عزالدین محمد ابو ریا شامل ہے۔ الفوار کیمپ سے تین، دورا کے علاقے سے دو اور رام اللہ کے نواحی علاقے الجزون سے پانچ افراد کو حراست میں لیا گیا۔