رپورٹ کے مطابق فلسطینی محکمہ امور اسیران کی جانب سے جاری کردہ ایک رپورٹ میں بتایا گیا ہے کہ اسرائیلی زندانوں میں قید 7000 سے زائد فلسطینیوں میں 1700 مختلف اقسام کی بیماریوں میں مبتلا ہیں۔
رپورٹ میں کہا گیا ہے کہ اسرائیلی زندانوں میں بیمار پڑے فلسطینی صہیونی جیلروں کے رحم وکرم پرہیں، کیونکہ مریضوں کے ساتھ نہایت ظالمانہ سلوک جاری ہے۔
رپورٹ میں بتایا گیا ہے کہ کئی مریض قید خود سے چلنے پھرنے کی بھی طاقت نہیں رکھتے ہیں جو سسک سسک کرموت کی طرف بڑھ رہے ہیں۔ صہیونی جیلران کا علاج کرانے کے بجائے الٹا ان کا مذاق اڑاتے ہیں۔ کئی فلسطینی زخمی حالت میں حراست میں لیے گئے ہیں اور جیلوں میں ڈالے جانے کے بعد ان کی مرہم پٹی تک نہیں کی گئی ہے۔
فلسطینی محکمہ امور اسیران نے عالمی برادری سے پرزورمطالبہ کیا ہے کہ وہ اسرائیلی جیلوں میں مریض قیدیوں کے ساتھ اسرائیلی انتظامیہ کے ناروا سلوک کا نوٹس لے اور بیمار اسیران کو ان کے حقوق دلانے کے لیے اسرائیل پر دباؤ ڈالے۔
خیال رہے کہ اسرائیل کی جیلوں میں مجموعی طورپر 7 ہزار سے زائد فلسطینی پابند سلاسل ہیں۔ ان میں 500 بچے اور ایک سو سے زائد خواتین قید ہیں۔