فلسطین کے مقبوضہ شہر بیتونیا کے مغرب میں قائم اسرائیل کی بدنام زمانہ جیل "عوفر” میں سینکڑوں فلسطینیوں نے جیل میں چھپن روز سے بھوک ہڑتالی فلسطینی قیدی شیخ خضرعدنان کے ساتھ اظہار یکجہتی اور اسرائیلی مظالم کےخلاف احتجاجی مظاہرہ کیا۔
مظاہرے میں سینکڑوں افراد شریک تھے۔ اسرائیلی فوج نے مظاہرین کو منتشر کرنے کے لیے ان پر ربڑ کی گولیوں، اشک آور گیس کی بوچھاڑ کے ساتھ وحشیانہ لاٹھی چارج کیا۔ جس کے نتیجے میں کم سے کم سولہ افراد زخمی ہوگئے۔
مظاہرین نے صہیونی جیل پرحملے کی کوشش کی تاہم اس موقع پرتعینات اسرائیلی فوج نے طاقت کے ذریعے فلسطینی شہریوں کو آگے بڑھنے سے روک دیا۔ اسرائیلی فوج کے لاٹھی چارج کے جواب میں فلسطینیوں نے جوابی کارروائی کرتے ہوئے ان پرپھتراؤ کیا۔ اسرائیلی فوج کے لاٹھی چارج میں فلسطینی ٹی وی کی ایک خاتون نامہ نگار سارہ الغذرہ بھی زخمیوں میں شامل ہیں۔