پانچ سال سے اسرائیلی محاصرے میں گھری فلسطینی ساحلی غزہ کی پٹی میں اسرائیلی حملوں کا سلسلہ جاری ہے۔ گزشتہ ماہ پٹی میں آباد چار فلسطینی ان حملوں میں شہید جبکہ پندرہ زخمی ہو گئے۔
غزہ میں قائم فلسطینی حکومت کی میڈیکل سروسز کی رپورٹ کے مطابق اس ماہ زیادہ حملے شہری علاقوں پر کیے گئے۔
جمعرات کے روز جاری کردہ رپورٹ میں میڈیکل سروسز کے ترجمان ادھم ابوسلمیہ کی جانب سے جاری بیان میں بتایا گیا کہ نومبر کے مہینے کے دوران محمد زاھر الکیلانی، محمد عامر ابو حلمیہ اور نصر ابراھیم علیان نامی تین فلسطینی شہری شمالی غزہ میں شہید ہوئے۔ جبکہ عبد اللہ عید مھنا جنوبی ضلع خان یونس میں ایک حملے میں جاں بحق ہوئے۔ شہید ہونے والے تمام افراد تیرہ سے انیس سال کے لڑکے تھے۔
رپورٹ کے مطابق اس ماہ فرانسیسی سفیر اور ان کی بیوی سمیت اسرائیلی گولہ باری اور فائرنگ کے واقعات میں پندرہ افراد زخمی ہوگئے ہیں۔ اکثر افراد اسرائیلی لڑاکا طیاروں کے راکٹ حملوں کی زد میں آئے۔
ابو سلمیہ نے بتایا کہ اسرائیل کی جانب سے کیے جانے والے خوفناک حملوں سے غزہ کے شہری علاقوں کی خواتین اور بچوں میں شدید خوف و ہراس پھیلا رہا۔