فلسطینی اتھارٹی کے زیرانتظام مقبوضہ مغربی کنارے کے علاقوں میں صدر محمود عباس کے زیرکمانڈ سیکیورٹی فورسز اور اسرائیلی فوج کے درمیان سیکیورٹی تعاون کا سلسلہ جاری ہے۔
اسرائیلی فوج اور عباس ملیشیا نے اسرائیلی فوج کے ہمراہ مغربی کنارے کے تاریخی شہر الخلیل میں جبل جوہر کے مقام پر چھاپہ مارا اور فلسطینیوں کے گھروں کی تلاشی لی۔
عینی شاہدین کے مطابق اسرائیلی فوج اور فلسطینی سیکیورٹی اہلکار چھ فوجی گاڑیوں پر جبل جوہر کےعلاقے میں داخل ہوئے اور قصبے کے تمام داخلی اور خارجی راستے بند کر دیے۔ جس کے بعد گھر گھر تلاشی کا سلسلہ شروع ہوا۔ تلاشی کی کارروائی میں فلسطینی خواتین اور بچوں کو زد و کوب کیا گیا۔ کئی گھروں سے اسرائیلی فوجیوں نے قیمتی سامان بھی قبضے میں لے لیا۔ قبضے میں لیے گئے سامان میں کمپیوٹرز اور دیگر اشیاء شامل ہیں۔
ایک عینی شاہد نے بتایا کہ اسرائیلی فوجی تلاشی لیتے رہے اور فلسطینی سیکیورٹی اہلکار ان کی حفاظت پر مامور ڈیوٹی دیتے رہے۔ خیال رہے کہ یہ الخلیل میں گذشتہ ایک ہفتے کے دوران عباس ملیشیا اور اسرائیلی فوج کی دوسری مشترکہ کارروائی ہے۔
مقامی فلسطینی باشندے کا کہنا تھا کہ علاقے میں فلسطینی انتظامیہ کی جانب سے متعدد مرتبہ کہا گیا تھا کہ جبل جوہرمیں منشیات فروش چھپے ہوئے ہیں جن کےخلاف کسی بھی وقت کاروائی کی جا سکتی ہے تاہم اسرائیلی فوج کے ہمراہ آپریشن کا مقصد منشیات فروشوں کے خلاف کارروائی نہیں بلکہ فلسطینی مزاحمت کاروں کی تلاش ہے۔