اسرائیلی سکیورٹی فورسز نے مغربی کنارے میں میڈیا اور پریس کے ادارے کے ڈائریکٹر اور معروف صحافی امین ابو وردہ کو حراست میں لے لیا ہے۔ چھیالیس سالہ ابو وردہ کو نابلس میں فلسطینی پناہ گزینوں کے بلاطہ کیمپ سے گرفتار کیا گیا۔
ابووردہ کی بیوی ’’ام عمر‘‘ نے ذرائع ابلاغ کو بتایا کہ اسرائیلی فوجی اہلکاروں کی بڑی تعداد نے رات ایک بجے کے قریب کئی منزلوں پر مشتمل ان کے گھر کا محاصرہ کیا اور پھر دروازے توڑ کر اندر داخل ہو گئے۔ گھر میں توڑ پھوڑ کرنے کرنے کے بعد صہیونی فورسز نے ابو وردہ کو بھی حراست میں لے لیا۔
ام عمر نے بتایا کہ اسرائیلی فورسز نے پہلے گھر میں موجود ان کے شوہر اور ان کے دیگر بھائیوں کو پہلے ایک کمرے میں اکٹھا کیا اور ان کےشناخت نامے طلب کیے اور پھر تفتیش کے بعد ابو وردہ کو گرفتار کر کے نامعلوم مقام کی جانب منتقل کر دیا ہے۔
واضح رہے ابووردہ ملیشیا میں الیکٹرانک میڈیا میں ڈاکٹریٹ کر رہے ہیں اور ان کی پی ایچ ڈی اختتامی مراحل میں ہے۔ انہوں نے نجاح یونیورسٹی سے ماسٹر کر رکھا ہے اور وہ نجاح یونیورسٹی اور نابلس کی ایک یونیورسٹی میں لیکچر بھی دیتے ہیں۔