مقبوضہ بیت المقدس (روز نامہ قدس ۔آن لائن خبر رساں ادارہ) بین الاقوامی القدس فاؤنڈیشن نے خبردار کیا ہے کہ مسجد اقصیٰ کو یہودیانے، اسے مسلمانوں سے خالی کرنے اور زمانی اور مکانی اعتبار سے تقسیم کرنے کی اسرائیلی سازشوں میں غیرمسبوق اضافہ ہوا ہے۔
روز نامہ قدس کو موصول ہونے والی اطلاعات کے مطابق القدس فاؤنڈیشن کے ڈائریکٹریاسین حمود نےایک بیان میں کہا کہ مسجد اقصیٰ کو گذشتہ کئی عشروں سے خطرات کا سامنا ہے مگر اب ان خطرات میں غیرمعمولی اضافہ ہوا ہے۔
اُنہوں نے کہا کہ اسرائیل ایک سوچے سمجھے منصوبے کے تحت مقبوضہ بیت المقدس سے فلسطینی وجود کا خاتمہ کرنا چاہتا ہے۔ اس مذموم مقصد کے لیے اسرائیل تلمودی روایات کی ترویج واشاعت کے ذریعے مقبوضہ بیت المقدس کے تاریخی، جغرافیائی، مذہبی اور آبادیاتی اسٹیٹس کو تبدیل کررہا ہے۔
انہوں نے مزید کہا کہ جیسے جیسے اسرائیل میں کنیسٹ کے انتخابات قریب آرہے ہیں القدس اور مسجد اقصیٰ کے خلاف اسرائیلی ریاست کی تہویدی سازشوں میں اضافہ ہو رہا ہے۔
یاسین حمود نے کہا کہ اسرائیلی حکومت کی سرکاری سرپرستی میں صیہونی آباد کار قبلہ اوّل کی بے حرمتی کررہےہیں۔ قبلہ اوّل پر صیہونی انتہا پسندوں کے دھاوؤں میں مسلسل اضافہ ہو رہا ہے۔