مقبوضہ بیت المقدس (روز نامہ قدس ۔آن لائن خبر رساں ادارہ) اسرائیل نے مقبوضہ بیت المقدس میں اردن کے قائم کردہ محکمہ اوقاف کے سربراہ اور ممتاز عالم دین الشیخ عبدالعظیم سلھب اور ان کے نائب الشیخ ناجح بکیرات کو مسجد اقصیٰ میں داخل ہونے پر پابندی عائد کی ہے۔
روز نامہ قدس کو موصول ہونے والی اطلاعات کے مطابق محکمہ امور اسیران کی طرف سے جاری ایک بیان میں کہا گیا ہے کہ اسرائیلی پولیس نے محکمہ اوقاف کے سربراہ الشیخ عبدالعظیم سلھب اور ان کے نائب ناجح بکیرات کے مسجد اقصیٰ میں داخلے پر پابندی عائد کی ہے۔ وہ اگلے 7 دن تک مسجد اقصیٰ میں نماز کی ادائیگی سے محروم کر دیے گئے ہیں۔
فلسطینی محکمہ اسیران کے مندوب محمد محمود نے بتایا کہ اسرائیلی پولیس نے دونوں رہنماؤں کی گرفتاری کے دوران عدالت سے الشیخ سلھب اور بکیرات کی القدس سے بے دخلی کا فیصلہ جاری کرایا۔
انہوں نے کہا کہ اسرائیلی فوج نے الشیخ سلھب اور ناجح بکیرات سمیت درجنوں کارکنوں کو القدس کی انتظامی کمیٹی کے ارکان کو ان کے گھروں سے اُٹھا کر ’’مسکوبیہ‘‘ حراستی مرکز منتقل کر دیا۔ بعد ازاں انہیں مسجد اقصیٰ میں داخلے کے لیے 7 دن تک پابندی عائد کی گئی ہے۔