"محمود عباس” کا ملک واپسی پر عام انتخابات کی تاریخ کا اعلان کرنے کا فیصلہ

(روزنامہ قدس ۔آن لائن خبر رساں ادارہ)  فلسطینی اتھارٹی کے صدر "محمود عباس” نے کہا ہے کہ  وہ اپنے ملک واپس پہنچ  کر "غزہ” ، مغربی کنارے اور مقبوضہ بیت المقدس میں عام انتخابات کے لیے تاریخ کا اعلان کریں گے۔

نیویارک میں اقوام متحدہ کی جنرل اسمبلی کے 74 ویں اجلاس سے خطاب کرتے ہوئے  فلسطینی اتھارٹی کے صدر "محمود عباس” نے "اقوام متحدہ” اور دیگر متعلقہ بین الاقوامی اداروں سے مطالبہ کیا کہ وہ ان انتخابات کے انعقاد کی نگرانی کریں۔

انہوں نے کہا کہ اگر کوئی دوسری جماعت انتخابات کے اعلان کو روکنے کی کوشش کرے گی تو اس کی پوری طرح ذمہ دار ہوگی.

صدر محمودعباس کے اعلان کے بعد اسلامی تحریک مزاحمت’حماس’ نے آج  ایک بار پھر فلسطینی دھڑوں میں مصالحت کی ضرورت پر زور دیا ہے۔ حماس کا کہنا ہے کہ اس نے 8 جماعتوں کی طرف سے پیش کردہ مصالحتی تجاویز قبول کرلی ہیں۔حماس کا کہنا ہے کہ فلسطینیوں میں پائی جانے والی تقسیم کو ختم کرکےقومی اتحاد کی فضاء میں قومی حکومت کی تشکیل وقت کی ضرورت ہے۔ حماس کا کہنا ہے کہ وہ ملک میں پارلیمانی، بلدیاتی اور صدارتی انتخابات کے لیے پوری طرح تیار ہے۔