فلسطینی قانون ساز کونسل کے ڈپٹی اسپیکر ڈاکٹر احمد بحر کا کہنا ہے کہ قاھرہ میں جمع ہونے والی تمام فلسطینی جماعتیں اور دھڑے مجلس قانون ساز کو بحال اور فعال کرنے پر جلد از جلد اتفاق کر لیں، ان کا کہنا تھا کہ قانون ساز کونسل کا معطل رہنا مسئلہ فلسطین پر منفی اثرات مرتب کر رہا ہے۔
ڈاکٹر بحر کا کہنا تھا کہ فلسطینی بنیادی قانون کے مطابق کونسل کا اجلاس بلانے کا حق اسپیکر ڈاکٹر عزیز دویک کو ہے۔ انہوں نے کہا کہ قانون ساز کونسل کے مسلسل معطل رہنے سے فلسطینی قوم کو درپیش چیلجز کا حل مشکل ہوتا جا رہا ہے، فلسطینی مفاہمت جیسے قومی مقاصد کو شدید نقصان پہنچ رہا ہے۔
منگل کے روز ڈاکٹر احمد بحر کے جاری کردہ بیان کے مطابق جب تک اسپیکر ڈاکٹر عزیز دویک اور ’’تبدیلی و اصلاح‘‘ بلاک کے اراکین کو مغربی کنارے کی پارلیمان میں داخل ہونے کی اجازت نہیں دی جائے گی حقیقی مفاہمت پر عمل نہیں ہو سکتا۔ ان کا کہنا تھا کہ گزشتہ کسی بھی عرصے کے مقابلے میں آج فلسطینی مفاہمت پر عمل کی ضرورت سب سے زیادہ محسوس کی جا رہی ہے۔
ڈپٹی اسپیکر نے مزید کہا کہ قانون ساز کونسل کی کارروائی معطل رکھنے کے بہانے مضحکہ خیز ہیں۔ انہوں نے قاھرہ میں جمع ہونے والی تمام فلسطینی جماعتوں سے اپیل کی کہ وہ فلسطینی قوم کے مسلمہ حقوق پر قائم رہتے ہوئے جلد از جلد پائیدار اور دیرپا مفاہمت کی جانب رجوع کریں۔