فلسطین کے مقبوضہ مغربی کنارے میں جمعہ کے روز اسرائیل کی نسلی دیوار اور یہودی آباد کاری کےخلاف فلسطینیوں کے احتجاجی مظاہرے پر اسرائیلی فوج نے وحشیانہ لاٹھی چارج اور آنسو گیس کی شیلنگ کی جس کے نتیجے میں درجنوں افراد زخمی ہوئے ہیں۔
مرکز اطلاعات فلسطین کے مطابق رام اللہ شہر کے قریبی علاقے بلعین میں نماز جمعہ کے بعد سینکڑوں شہریوں نے ایک مرکزی شاہراہ پر جمع ہوکرصہیونی مظالم اور ریاستی دہشت گردی کےخلاف احتجاجی جلوس نکالا۔ اس موقع پرتعینات اسرائیلی پولیس اور فوج نے مشترکہ کارروائی کرتے ہوئے مظاہرین پر ربڑ کی گولیاں چلائیں،ان پر لاٹھی چارج کیا اور زہریلی آنسو گیس کی شیلنگ کی، جس کے نیتجے میں درجنوں افراد زخمی ہوگئے۔ زخمیوں میں کئی غیرملکی انسانی حقوق کے رضاکار بھی شامل ہیں۔
عینی شاہدین کے مطابق مقبوضہ مغربی کنارے میں جمعہ کے روز ہوئےمظاہرے میں شہری سخت مشتعل دکھائی دے رہے تھے، انہوں نے اسرائیل کےخلاف شدید نعرے بازی کے علاوہ فلسطینیوں کے درمیان مفاہمت کی راہ میں رکاوٹیں پیدا کرنے والے عناصر کوبھی سخت تنقید کانشانہ بنایا۔
خیال رہے کہ مقبوضہ مغربی کنارے کے مختلف علاقوں میں اسرائیل نے یہودی بستیوں کے تحفظ کے لیے سینکڑوں کلو میٹر کے علاقے پر نسلی دیوارتعمیر کر رکھی ہے جس نے فلسطینیوں کی اراضی، ان کے خاندانوں اور آبادیوں کو ایک دوسرے سےجدا کر رکھا ہے۔ اسرائیل کی اس نسل پرستی کےخلاف فلسطینی شہری گذشتہ تین سال سے مسلسل احتجاج کرتے آ رہے ہیں۔