رام اللہ (روز نامہ قدس ۔آن لائن خبر رساں ادارہ) فلسطین میں شہریوں کے سوشل سیکیورٹی کے حقوق کے لیے کام کرنے والی تنظیم ’’ سوشل سیکیورٹی فاؤنڈیشن ‘‘ کے سربراہ نے عہدے سے استعفیٰ دے دیا ہے۔
روز نامہ قدس کو موصول ہونے والی اطلاعات کے مطابق سوشل سیکیورٹی فاؤنڈیشن کے سربراہ حرزاللہ نے کہا کہ میں نے کابینہ کی جانب سے ریٹائرمنٹ اور پنشن اتھارٹی کا شعبہ ماجد الحلو کو دینے پر بہ طور احتجاج عہدے سے استعفیٰ دے دیا ہے۔
حرزاللہ کا کہنا تھا کہ وہ کابینہ کی جانب سے ماجد حلو کی تعیناتی کو غیرقانونی تصور کرتے ہیں۔ یہ تعینات فلسطینی سوشل سیکیورٹی فاؤنڈیشن میں مداخلت کے مترادف ہے۔
ایک سوال کے جواب میں حرزاللہ کا کہنا تھا کہ سوشل سیکیورٹی فاؤنڈیشن کی انتظامیہ کو برقرار رہنا چاہیے اور اس میں کسی قسم کی تبدیلی کی کوئی گنجائش نہیں۔
خیال رہے کہ فلسطینی اتھارٹی کی جانب سے حال ہی میں سوشل سیکیورٹی کے حوالے سے ایک نیا قانون منظور کیا تھا۔ فلسطینی سماجی تنظیموں اور عوام کی طرف سے نام نہاد سوشل سیکیورٹی قانون مسترد کردیا تھا۔