اسرائیلی اتھارٹی نے ضلع الخلیل کے شہر یطا کے مشرقی گاؤں یطا میں ایک مسجد، متعدد کنووں اور دیگر متعدد عمارتوں کو منہدم کر دیا تھا جس کےبعد علاقے میں سخت اشتعال پیدا ہو گیا ہے۔ اسرائیلی سکیورٹی فورسز نے اس علاقے کو گھیرے میں لے لیا ہے۔
صہیونی فوج کی بڑی تعداد نے علاقے میں سکیورٹی انتظامات سخت کر دیے ہیں۔ یطاء کی شاہراہوں پر اسرائیلی فورسز کے اہلکاروں کی بڑی تعداد کے گشت سے ساراعلاقہ فوجی چھاؤنی کا منظر پیش کرنے لگا۔
اسرائیلی حکام نے فلسطینیوں کے گھروں، کنووں اور مسجد کو گرانے کے بعد سارے علاقے کی شاہراہیں بند کر دی ہیں۔ خربہ الدیرات، امنیزل، سوسیااور اتوانہ کے علاقے مکمل طور پر بند کر دیے گئے ہیں۔ ان علاقوں میں متعدد فلسطینیوں کو گھر خالی کرنے کے نوٹس جاری کر دیے گئے ہیں۔
اسرائیلی فوج نے اس موقع پر علاقے کی بجلی بھی بند کر دی ہے۔ اسرائیلی بلڈوزروں نے علاقے کے بجلی گھر کو بھی منہدم کر ڈالا۔ اسرائیلی حکام کا کہنا ہے کہ یہ بجلی گھر بھی دیگر گھروں کی طرح غیر قانونی طور پر تعمیر کیا گیا تھا۔
علاقے کے باسیوں کا کہنا ہے کہ اسرائیلی فورسز اور انتہاء پسند یہودیوں کی جانب سے علاقے کے مکینوں پر حملے تیز ہو گئے ہیں آئے روز فلسطینی شہریوں کی املاک پر قبضہ کیا جا رہا ہے۔ درجنوں گھر گرائے جا چکے ہیں۔
اہل علاقہ نے انسانی حقوق کی عالمی تنظیموں سے شہریوں کو بنیادی حقوق سے محروم کرنے پر مشتمل اسرائیلی جارحیتوں کو روکوانے کا مطالبہ بھی کیا۔