اسرائیلی حکام نے کئی ماہ کے تعطل کے بعد فلسطینی شہر غزہ کی پٹی کے شہریوں کو مقبوضہ فلسطین میں صہیونی جیلوں میں زیرحراست اپنے عزیزوں سے ملنے کی اجازت دی ہے۔
مرکز اطلاعات فلسطین کے مطابق فلسطین میں اسیران کے حقوق کے لیے سرگرم تنظیم ’’واعد‘‘ نے اپنی رپورٹ میں اطلاع دی ہے کہ اسرائیلی سیکیورٹی حکام نے غزہ کے شہریوں کو اپنے اسیر عزیزوں سے ملنے کی دوبارہ اجازت دی ہے۔
فلسطینی شہریوں کا ایک وفد آج اسرائیلی جیل ’’نفحہ‘‘ میں اپنے پیاروں سے ملاقات کرے گا۔ رپورٹ میں بتایا گیا ہے کہ صہیونی حکام کی طرف سے فلسطینیوں کے 59 افراد کو اپنے 36 اسیران عزیزوں سے ملنے کی اجازت دی ہے، جو آج مختلف اوقات میں نفحہ جیل میں اپنے عزیزوں سے ملیں گے۔
خیال رہے کہ صہیونی حکومت نے پچھلے کئی ماہ سے فلسطینیوں کو ان کے عزیزو اقارب سے جیلوں میں ملاقات سے روک دیا تھا۔ صہیونی حکام کی جانب سے پابندی کی کوئی وجہ بھی نہیں بتائی گئی تھی تاہم اس پابندی کے دوران فلسطینی شہرغزہ کی پٹی پراسرائیلی فوج نے حملہ بھی کیا، جس کے نتیجے میں دو سو کے قریب افراد شہید اور ڈیڑھ ہزار زخمی ہو گئے تھے۔
بشکریہ: مرکز اطلاعات فلسطین