رام اللہ (روز نامہ قدس ۔آن لائن خبر رساں ادارہ) تحریک فتح کی مرکزی کمیٹی کے سینیر رکن اور فلسطینی دھڑوں میں مصالحت کے لیے سرگرم رہنما عزام الاحمد نے ایک متنازع بیان میں فلسطینی عوام کو مشتعل کر دیا۔ ان کا کہنا ہے کہ غزہ کو ’’باغی صوبہ‘‘ قرار دے کر مواصلات سمیت غزہ کو فراہم کی گئی تمام سہولیات ختم کر دی جائیں۔
روز نامہ قدس کو موصول ہونے والی اطلاعات کے مطابق سرکاری ٹی وی پرنشر ہونے والے پروگرام میں گفتگو کرتے ہوئے عزام الاحمد نے کہا کہ اگرآپ غزہ کی ہوا بند کرسکتے ہیں تو وہ بھی بند کردیں اور غزہ کو ایک باغی علاقہ قرار دیا جائے جو وطن سے الگ تھلگ ہوگیا ہے۔
عزام الاحمد نے غزہ کو ’’اغواء شدہ‘‘ طیارے کے مترادف قرار دیا اور کہا کہ مسلح ملیشیا حماس نےغزہ کے عوام کو یرغمال بنا رکھا ہے۔ حماس کو اس کی قیمت چکانا ہوگی یا اسے غزہ کو اپنے قبضے سے آزاد کرانا ہوگا۔