فلسطینی مزاحمتی تنظیم جہاد اسلامی نے گذشتہ روز رفح اور بیت لاھیا میں بمباری کی شدید مذمت کرتے ہوئے کہا ہے کہ اسرائیل جارحیت کا جواب دیکھنے کا انتظار کرے۔
غزہ میں جہاد اسلامی کی جانب سے جاری ایک بیان میں کہاگیا ہے کہ گذشتہ روز بیت لاھیا اور رفح کے مقامات پربمباری سے اسرائیل کے ناپاک عزائم کا صحیح اندازہ ہوتا ہے۔ ان حملوں کے بعد یہ واضح ہو گیا ہے کہ اسرائیل غزہ پر ایک بارپھر فوج کشی کرنے کا منصوبہ بنا رہا ہے اور اس کے لیے فضا تیار کی جا رہی ہے۔ بیان میں کہا گیاکہ اسرائیل بار بار فلسطینی عوام پرجنگ مسلط کرکے ان کے صبر کا امتحان لے رہا ہے تاہم صہیونیوں کو ان کے عزائم کی تکمیل میں کسی صورت میں بھی کامیابی نہیں ہوسکتی۔ اسرائیل طاقت کے ذریعے فلسطینی عوام کے حقوق غصب کرنے، ان کی زمین پرقبضہ کرنے اس پردنیا بھر سے یہودیوں کو لا کر بسانے کے ظالمانہ منصوبے کو تکمیل دینا چاہتا ہے۔ بیان میں گزشتہ روز اسرائیلی جارحیت سے شہید ہونے والے تین افراد کی شہادت پر گہرے رنج وغم کا اظہار کیا گیا اور لواحقین سے تعزیت کا اظہار کیا گیا۔ جہاد اسلامی نے واضح کیا کہ اسرائیل کو غزہ پرکسی بھی قسم کی فوج کشی مہنگی پڑے بھی اور مجاہدین صہیونی فوج کا منہ توڑ جواب دینے کی صلاحیت رکھتے ہیں، غزہ پر قبضے کا خواب پورا نہیں ہونے دیا جائے گا۔ بیان میں عالم اسلام اور بین الاقوامی برادری کی توجہ اسرائیلی مظالم کی جانب مبذول کراتے ہوئے صہیونی جارحیت رکوانے کا مطالبہ بھی کیا گیا