غزہ: صیہونی کمانڈر کا فلسطینیوں کے گھروں کو مسمار کرنے کے لئے کا منصوبہ

رپورٹ میں بتایا گیا ہے کہ اگست 2023 میں جب یهودا فاخ کو اسرائیلی فوج کی 252ویں بریگیڈ کا کمانڈر مقرر کیا گیا، تو اس نے اپنے بھائی غولان فاخ کو غزہ میں ایک خصوصی یونٹ تشکیل دینے کا حکم دیا، جس کا مقصد فلسطینیوں کے گھروں کو زمین کے ساتھ برابر کرنا تھا۔ اس یونٹ میں اس کے بھائیوں سمیت فوجی اور شہری شامل تھے۔

رپورٹ کے مطابق، یهودا فاخ نے اپنے بھائیوں کو اس کارروائی میں شامل کیا اور فوجی حکام کو آگاہ کیا کہ ان کے بھائی اس فوجی کارروائی کا حصہ ہیں اور انہیں خصوصی اجازت دی گئی کہ وہ بغیر کسی فوجی نگرانی یا اجازت کے غزہ میں داخل ہوں اور کارروائیوں کو انجام دیں۔ فاخ کے بھائی، جن میں غولان فاخ بھی شامل ہیں، ایک غیر رسمی حیثیت میں غزہ میں موجود تھے اور ان کا مقصد فلسطینیوں کے گھروں کو تباہ کرنا تھا۔

میدانی سطح پر اسرائیلی فوج کے جوانوں اور افسران نے اس کارروائی پر سوالات اٹھائے اور اس کے بارے میں معلومات حاصل کرنے کی کوشش کی، لیکن ان سے کہا گیا کہ یہ کارروائیاں یهودا فاخ اور اس کے بھائیوں کے خصوصی احکامات پر کی جا رہی ہیں، اور کسی کو ان پر سوال اٹھانے کی اجازت نہیں تھی۔

یہ تمام کارروائیاں "نتساریم” نامی علاقے میں کی جا رہی تھیں، جسے یهودا فاخ نے اپنی قیادت میں اپنے فوجی دستوں سے تیزی سے تباہ کرنے کا حکم دیا تھا، اور اس میں فلسطینیوں کے گھروں کو مکمل طور پر مٹانے کی کوشش کی جا رہی تھی۔ رپورٹ کے مطابق، ان کارروائیوں کا مقصد نہ صرف علاقے کو تباہ کرنا تھا بلکہ یہ بھی تھا کہ فلسطینیوں کو وہاں سے جبراً نکالا جائے تاکہ وہ اپنے گھروں میں واپس نہ آ سکیں۔

اس تحقیق میں یہ بھی بتایا گیا کہ اس یونٹ نے غیر قانونی طور پر فلسطینیوں کے گھروں کو تباہ کرنے کے دوران کوئی معیاری طریقہ کار نہیں اپنایا۔ نہ صرف فوجی بلکہ کچھ غیر فوجی شہری بھی اس کارروائی میں شامل تھے اور انہوں نے فلسطینیوں کے گھروں کو تباہ کرنے کی ذاتی طور پر نگرانی کی۔ ان کارروائیوں کو مکمل طور پر غزہ میں موجود فوجی افسران کی نگرانی سے آزاد کر دیا گیا تھا، اور یہ تمام عمل یهودا فاخ کے براہ راست احکامات پر ہو رہا تھا۔

یہ رپورٹ اس بات کی نشاندہی کرتی ہے کہ غیر قانونی صیہونی ریاست اسرائیل کے افسران اور ان کے اہل خانہ نے فلسطینیوں کے حقوق اور زندگیوں کی سنگین خلاف ورزی کی ہے، اور ان کارروائیوں کے نتیجے میں فلسطینیوں کی مشکلات میں مزید اضافہ ہوا ہے۔ ان واقعات کی تفصیلات عالمی برادری کے لیے ایک سنگین انتباہ ہیں، خاص طور پر ایسے حالات میں جب فلسطینی عوام پہلے ہی شدید ظلم و جبر کا سامنا کر رہے ہیں۔