(روز نامہ قدس ۔آنلائن خبر رساں ادارہ) مقبوضہ فلسطین کے محصور شہر غزہ میں غیر قانونی صیہونی ریاست اسرائیل کی دہشتگردی کے آغاز سے اب تک دو سو دو صحافی شہید ہو چکے ہیں۔
سرکاری میڈیا آفس نے صحافی عمر الدراوی کی شہادت کے بعد جاری تفصیلات میں صیہونی ریاست اسرائیل کی طرف سے فلسطینی صحافیوں کو نشانہ بنانے اور قتل کرنے کی شدید مذمت کرتے ہوئے بتایا ہے کہ اسرائیلی فوج دانستہ نہتے شہریوں اسپتال کے عملے اور صحافیوں کو نشانہ بنا رہی ہے۔
رپورٹ میں انٹرنیشنل فیڈریشن آف جرنلسٹس اور عالمی صحافتی تنظیموں سے مطالبہ کیا کہ وہ نہتے شہریوں پر صیہونی جارحیت کی مذمت کریں اور اس کے خلاف آواز اٹھائیں۔ غزہ میں صحافیوں کے خلاف منظم جرائم کے لیے غیر قانونی صیہونی ریاست اسرائیل اور اس کے اتحادی ممالک کو مکمل ذمہ دار ٹھہرایا گیا ہے۔ عالمی برادری سے مطالبہ کیا گیا کہ وہ اس جارحیت کو روکنے کے لیے موثر اقدامات کرے اور صحافیوں کو تحفظ فراہم کرے۔