(فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر سلفیت میں جمعرات کے روز یہودی آباد کاروں کی بڑی تعداد نے کفر حارس کے مقام پر واقع فلسطینیوں کے مقدس مقامات پریلغار کی اور تلمودی تعلیمات کے مطابق مذہبی رسومات ادا کی گئیں، جس پر فلسطینی شہریوں میں سخت غم وغصہ کی لہر دوڑ گئی ہے۔
عینی شاہدین نے بتایا کہ جمعرات کو یہودی آباد کاروں کی بڑی تعداد کفر حارس میں گاڑیوں کے ذریعے داخل ہوئی اور وہاں پر موجود مسلمانوں کے تاریخی مقامات پر دھاوے بولنے کے بعد مذہبی رسومات ادا کیں۔ یہودی آباد کاروں کو اسرائیلی فوج کی جانب سے فول پروف سیکیورٹی مہیا کی گئی تھی۔
عینی شاہدین کا کہنا ہے کہ یہودی بلوائیوں کی مقدس مقامات پر یلغار کے بعد مقامی فلسطینی آبادی بھی گھروں سے باہر نکل آئی۔ فلسطینی نوجوانوں نے یہودی آباد کاروں پر سنگ باری کی تاہم قابض فوجیوں نے فلسطینیوں کو یہودیوں کے قریب جانے سے روک دیا۔