رام اللہ (روز نامہ قدس ۔آن لائن خبر رساں ادارہ) عباس ملیشیا کی جیلوں میں اسلامی تحریک مزاحمت (حماس) کے ایک سو کے قریب رہنماؤں اور کارکنوں کو حراست میں لیا ہواہے۔
روز نامہ قدس کو موصول ہونے والی اطلاعات کے مطابق عمومی آزادیوں کے شعبے کے نگران خلیل عساف نے انکشاف کیا کہ اس وقت بھی عباس ملیشیا کی جیلوں میں حماس کے 96 رہنما اور کارکن زیرحراست ہیں۔
عساف نے کہا کہ عباس ملیشیا کی طرف سے سیاسی گرفتاریوں کا سلسلہ ایک دن کے لیے بھی بند نہیں کیا گیا۔
ان کا کہنا تھا کہ فلسطین کی تاریخ میں ایسا کبھی نہیں ہوا جیسا آج فلسطینی اتھارٹی کررہی ہے۔ ہرطرف انتقامی کارروائیاں جاری ہیں۔
خلیل عساف نے کہا کہ ہم فلسطینی اتھارٹی کی انتقامی اور نفرت انگیز کارروائیوں سے خوف دہ نہیں ہیں۔ صدر عباس اور ان کا ٹولہ حماس کے رہنماؤں اور کارکنوں کو طاقت کے ذریعے دبانے اور ہراساں کرنے کا سلسلہ جاری رکھے ہوئے ہے مگر اس سے فلسطینی خوف زدہ نہیں ہوں گے۔ ان کا کہنا تھا کہ گرفتاریاں ہمارا راستہ نہیں روک سکتیں۔