(روز نامہ قدس ۔آنلائن خبر رساں ادارہ ) بیت المقدس کی خاطر اور رسول اللہ صلی اللہ علیہ وسلم کے مشن کی حمایت کے مقصد سے شروع ہونے والا طوفان الاقصیٰ اللہ کی مدد سے جاری رہے گا۔
غیر قانونی صیہونی ریاست اسرائیل کے مظالم کے خلاف برسرپیکار اسلامی تحریک مزاحمت حماس کے عسکری ونگ عزالدین القسام بریگیڈز کے ترجمان ابو عبیدہ نے ایک آڈیو پیغام میں اعلان کیا ہے کہ طوفان الاقصیٰ کو جاری 133 دن گزر چکے ہیں اس جنگ نے پورے خطے کا چہرہ بدل کر رکھ دیا ہے۔ بہت سے اسرائیل نواز ممالک کو بے نقاب کردیا گیا ہے۔ ہماری یہ جنگ ایک مقدس مشن ہے جو دشمن کی مکمل شکست اور اس کے زوال تک جاری رہے گی۔
ابو عبیدہ نے کہا کہ اقصیٰ اور اسراء و معراج کی سرزمین پر غاصب دشمن کے خلاف ہماری جنگ پورے عالم اسلام کی جنگ ہے اور یہ جنگ انشاء اللہ تاریخ کا ایک نیا موڑ ثابت ہوگی۔
انہوں نے کہا کہ ہماری قوم دشمن کے خلاف مسلسل پانچ ماہ سے برسر جہاد ہے اور ہمارے مجاھدین دشمن کی رعونت اور بربریت کے خلاف پوری ثابت قدمی سے لڑ رہے ہیں۔
دشمن اپنے جرائم کو آگے بڑھانے کے لیے جنگی جرائم اور قتل عام کا سہارا لے رہا ہے مگر وہ قتل عام کے باوجود فلسطینی قوم کو شکست نہیں دے سکتا بلکہ خود شکست فاش سے دوچار ہے۔