مقبوضہ بیت المقدس (روز نامہ قدس ۔آن لائن خبر رساں ادارہ) صیہونی پولیس نے مسجد اقصیٰ میں چھاپہ مار کارروائی کے دوران فلسطینی محکمہ اوقاف کے ایک عہدیدار کو حراست میں لے لیا۔
روز نامہ قدس کو موصول ہونے والی اطلاعات کے مطابق صیہونی پولیس نے مسجد اقصیٰ کے احاطے میں گھس کر اشرف الشرباتی نامی ایک فلسطینی شہری کو تشدد کا نشانہ بنایا جس کےبعد اسے حراست میں لے لیا۔الشرباتی فلسطینی محکمہ اوقاف کا ملازم اور مسجد اقصیٰ کی مرمتی کمیٹی کا رکن ہے۔
رپورٹ کے مطابق الشرباتی کو حراست میں لیے جانے کےبعد باب الاسباط کے قریب ایک پولیس مرکز منتقل کردیا گیا ہے۔
یہ واقعہ ایک ایسے وقت میں پیش آیا جب صیہونی انتہا پسندوں کی بڑی تعداد قبلہ اوّل میں گھس کر مقدس مقام کی بے حرمتی کررہی تھی۔ گذشتہ روز 70 صیہونی آباد کاروں نے مسجد اقصیٰ کی بے حرمتی کی۔ صیہونی آباد کار 6 گروپوں کی شکل میں قبلہ اوّل میں داخل ہوئے۔