رام اللہ (روز نامہ قدس ۔آن لائن خبر رساں ادارہ) اسرائیلی فوج نے طویل تعاقب کے بعد ایک فلسطینی شہری کو گذشتہ شب حراست میں لینے کے بعد المسکوبیہ ٹارچر سیل میں منتقل کردیا ہے۔ 33 سالہ عاصم البرغوثی کو اسرائیلی فوج کئی روز سے گرفتار کرنے کی کوشش کررہی تھی مگر اسے گرفتار نہیں کیا جاسکا تھا۔ قبل ازیں اسرائیلی فوج نے عاصم کے ایک بھائی صالح البرغوثی کو 12 دسمبرگولیاں مار کر شہید کردیا۔ شہید کے والد عمر البرغوثی اور اس کے بھائی عاصف البرغوثی کو حراست میں لے لیا تھا۔
روز نامہ قدس کو موصول ہونے والی اطلاعات کے مطابق اسرائیلی فوج نے عاصم کو گرفتار کرنے کے لیے کئی بار چھاپے مارے مگر اسرائیلی فوج اسے گرفتار کرنے میں بری طرح ناکام رہی۔ عاصم کو گذشتہ شب کو رام اللہ کے نواحی علاقے کوبر سے حراست میں لے کر ٹارچرسیل میں ڈال دیا تھا۔
خیال رہے کہ عاصم البرغوثی کی یہ پہلی گرفتاری نہیں۔ وہ اسرائیلی جیلوں میں 11 سال قید کاٹ چکے ہیں۔ انہیں آخری بار اپریل 2018ء کو رہا کیاگیا جب کہ ان کے والد 66 سالہ عمر البرغوثی 26 سال اسرائیلی زندانوں میں پابند سلاسل رہےہیں۔