مقبوضہ بیت المقدس (روز نامہ قدس ۔آن لائن خبر رساں ادارہ) اسرائیلی فوج نے مسجد اقصیٰ کے تاریخی باب الرحمت کو کھلوانے کے آپریشن کے دوران مسجد کے 50 سے زائد محافظ حراست میں لے لیے ہیں۔
دوسری جانب اسلامی اوقاف کی طرف سے جاری کردہ ایک بیان میں قبلہ اوّل کے حفاظتی عملےکے خلاف اسرائیلی فوج کے کریک ڈائون کو وحشیانہ اور فلسطینیوں کے دینی امور میں کھلم کھلا مداخلت قرار دیا ہے۔
روز نامہ قدس کو موصول ہونے والی اطلاعات کے مطابق اسلامی اوقاف نے مسجد اقصیٰ کے محافظ عمران الرجبی کی گرفتاری اور اسرائیلی فوج کی طرف سے جوتوں سمیت مسجد اقصیٰ میں گھس کر مقدس مقام کی بے حرمتی کی شدید مذمت کی ہے۔
بیان میں کہا گیا ہے کہ مصلیٰ باب رحمت میں اسرائیلی فوج کی اشتعال انگیزی اور قبلہ اوّل کے محافظوں کی گرفتاری سنگین جرم ہے اور اس کا ذمہ دار اسرائیل ہے۔
بیان میں مزید کہا گیا ہے کہ اسرائیلی ریاست ایک سوچے سمجھے منصوبے کے تحت مسجد اقصیٰ کے تقدس کو پامال کررہی ہے۔ مسجد اقصیٰ اور مقدس مقام کی نگرانی پرمامور شہری خاص طورپر صیہونیوں کے انتقام کا نشانہ بن رہے ہیں۔
بیان میں کہا گیا ہے کہ مصلیٰ باب رحمت مسجد اقصیٰ کا حصہ ہے اور اسے کسی بھی صورت میں قبلہ اوّل سے الگ نہیں کیا جا سکتا۔ اسرائیل باب رحمت کو قبلہ اوّل سے الگ کرنے کی مجرمانہ سازش کر کے مسجد اقصیٰ کو تقسیم کرنے کی سازش کر رہا ہے۔