(روزنامہ قدس ۔آن لائن خبر رساں ادارہ) صیہونی فوج کی مقبوضہ بیت المقدس کے مختلف علاقوں میں چھاپہ مارکارروائیاں جاری ہیں، قابض فوج نے مسجد اقصیٰ کی خاتون محافظ سمیت 14 فلسطینی شہریوں کو گرفتارکرلیا۔
فلسطینی میڈیا کے مطابق گزشتہ روز قابض صیہونی فوج نے مسجد اقصیٰ کے جنوبی میں واقع سلوان میں مسجد اقصیٰ کی خاتون محافظ ھبہ سرحان کے گھر پر چھاپہ مارا اور تلاشی کے نام پر لوٹ مار کرنے کے بعد انھیں گرفتار کرلیا۔
دوسری جانب قابض فوج نے مقبوضہ بیت المقدس کے قدیم شہر میں مسجد اقصیٰ سے متصل صدیہ محلے میں چھاپہ مارا ، اور عمر زعینین اور رامی زعینین کو گرفتار کرنے سے قبل متعدد شہریوں کے گھروں پر دھاوا بول دیا ، علاوہ ازیں مقبوضہ بیت المقدس کے پرانے شہر سے شیخ خالد المغربی ، عبد الہداد اور محمد جابر کو بھی گرفتار کیا۔
قابض فورسز نے مقبوضہ بیت المقدس کے وسط میں واقع الیسوویہ گاؤں میں شہریوں کے گھروں پر چھاپے مارے اور حمید عبید ، محمد محمود ، محمد الیان ، بشار دری ، اور سمیر عبید کو بھی گرفتار کیا جبکہ اس دوران سلوان قصبے سے دو کم عمر بچوں 7 سالہ محمد عبد اللہ یعقوب الشویقی اور 9 سالہ امیر محمد ال عباسی گرفتار کرلیا۔