نابلس (روز نامہ قدس ۔آن لائن خبر رساں ادارہ) فلسطین کے مقبوضہ مغربی کنارے کے شمالی شہر نابلس میں اسرائیلی فوج نے ایک فلسطینی کار ڈرائیور کو گولیاں مار کر شدید زخمی کردیا۔
روز نامہ قدس کو موصول ہونے والی اطلاعات کے مطابق اسرائیلی فوج نے نابلس کے جنوب میں حوارہ چوکی کے قریب ایک کار پر گولیاں چلائیں جس کے نتیجے میں کار ڈرائیور زخمی ہوگیا اور کار بھی نقصان پہنچا ہے۔
اسرائیلی فوج نے زخمی ہونے والے کار ڈرائیور کو حراست میں لینے کے بعد نامعلوم مقام پر منتقل کردیا ہے۔
عینی شاہدین نے بتایا کہ فلسطینی شہری پر فائرنگ کے واقعے کے بعد اسرائیلی فوج نے جائے وقوعہ کو گھیرے میں لینے کے بعد کئی گھنٹے تک سیل کردیا تھا۔
عبرانی ویب سائیٹ’ 0404‘کے مطابق اسرائیلی فوجیوں نے فلسطینی کار ڈرائیورکو اس وقت گولی ماری جب اس نے صیہونی آباد کاروں کو کچلنے کی کوشش کی تھی۔ فلسطینی شہری کی کار کی ٹکر سے بھاگنے والے تین صیہونی زخمی ہوگئے۔