نابلس (روز نامہ قدس ۔آن لائن خبر رساں ادارہ) فلسطین کے مقبوضہ مغربی کنارے کے شمالی شہر نابلس میں اسرائیلی فوج اور صیہونی آباد کاروں نے فلسطینیوں کی درجنوں دونم اراضی غصب کرنے کے بعد اس پر کھدائی کردی اور فلسطینی شہریوں کے زیتون کے 100 پھل دار درخت اکھاڑ پھینکے۔
روز نامہ قدس کو موصول ہونے والی اطلاعات کے مطابق مقامی فلسطینی سماجی کارکن ’’ ہاشم البدارین ‘‘ نے بتایا کہ اسرائیلی فوج نے کئی دونم کے علاقے پر فلسطینیوں کے 100 زیتون کے پھل دار پودے اکھاڑ پھینکے اور فلسطینیوں کے ملکیتی پانی کے تین کنوئیں بھی مسمار کردیئے۔ یہ باغ اور پانی کے کنوئیں محمد کامل جعافرہ اور علی عواد فطافطہ کی ملکیت بتائے جاتے ہیں۔