رام اللہ (روز نامہ قدس ۔آن لائن خبر رساں ادارہ) اسرائیلی ریاست کی ایک فوجی عدالت نے زیرحراست متعدد فلسطینی اسیرات کو کڑی سزائیں اور بھاری جرمانے کیے ہیں۔
روز نامہ قدس کو موصول ہونے والی اطلاعات کے مطابق فلسطینی محکمہ امور اسیران کی طرف سے جاری کی گئی رپورٹ میں بتایا گیا ہے کہ اتوار کے روز اسرائیل کی ’’عوفر ‘‘ نامی فوجی عدالت نے 25 سالہ بتول خالد الرمحی اور القدس کی امینہ محمود کو بالترتیب 29 اور 33 ماہ قید کی سزائیں سنائیں۔دونوں اس وقت ’’ دامون ‘‘ جیل میں قید ہیں۔ انہیں 12 مارچ 2017ء کو حراست میں لیا گیا تھا۔
قبل ازیں عوفر فوجی عدالت نے 19 سالہ اسراء سمیح جابر کو 30 ماہ قید اور 2000 شیکل جرمانہ کی سزا سنائی۔ فلسطینی اسیران اتھارٹی کے مطابق اسرائیلی عقوبت خانوں میں 54 فلسطینی خواتین پابند سلاسل ہیں۔ ان میں سے بیشتر کو دامون اور ھشارون جیسے بدنام زمانہ عقوبت خانوں میں ڈالا گیا ہے۔