مقبوضہ بیت المقدس(روز نامہ قدس ۔آن لائن خبر رساں ادارہ) صیہونی حکام نے اردن کی سرحد پر ’’باب امن‘‘ گزرگاہ پر ایک پل کی تعمیر مکمل کر لی۔ یہ علاقہ وادی اردن سے اردن کے ساتھ متصل ہے۔
روز نامہ قدس کو موصول ہونے والی اطلاعات کے مطابق عبرانی نیوز ویب سائیٹ ’’والاہ‘‘ نے اپنی رپورٹ میں بتایا ہے کہ اردن سے متصل ’’باب امن‘‘ پر پل کی تعمیر ایک ایسے وقت میں مکمل کی گئی ہے جب دونوں ملکوں کے درمیان تعلقات کشیدگی کا شکار ہیں۔
ویب سائیٹ نے اسرائیلی حکومت کے ایک ذریعے کے حوالے سے کہا ہے کہ اردن سے متصل ’’باب امن‘‘ پر تعمیر کردہ پل کی لمبائی 352 میٹر ہے۔ یہ پل دنوں ملکوں کے درمیان صنعتی زون کے قیام میں کلیدی کردار ادا کر سکتی ہے۔ اس علاقے میں سیکڑوں کارخانے لگانے کا منصوبہ تیار کیا گیا ہے۔
ویب سائیٹ کی رپورٹ کے مطابق اس پل سے گذرنے کے لیے پاسپورٹ لازمی قرار دیا گیا ہے۔
خیال رہے کہ اردن اور اسرائیل نے سنہ 1994ء میں ’’امن معاہدے‘‘ کے بعد وادی اردن سے متصل علاقے میں مشترکہ صنعتی زون کے قیام کا معاہدہ کیا تھا۔
دونوں ملکوں نے صنعتی زون کے قیام کے لیے 700 دونم کا رقبہ مختص کیا ہے۔ اسرائیل 250 دونم اور باقی رقبہ اردن فراہم کرے گا۔ پل کی تعمیر کے لیے 17 ملین ڈالر صرف کیے گئے ہیں۔